Mae ColegauCymru yn dathlu ein colegau yn cyrraedd y rownd derfynol mewn chwe chategori ar gyfer Gwobrau Prentisiaethau Cymru 2021.
Gyda chofnodion o gategorïau gan gynnwys Dysgwr y Flwyddyn - Hyfforddeiaethau (Ymgysylltu), Dysgwr y Flwyddyn - Hyfforddeiaethau (Lefel 1), Prentis Sylfaen y Flwyddyn, Prentis y Flwyddyn, Prentis Uwch y Flwyddyn a Doniau’r Dyfodol, rydym yn falch bod ymdrechion dysgwyr o Goleg Gwent, Coleg Sir Benfro, Grŵp Colegau NPTC, Coleg Cambria, Coleg y Cymoedd a Choleg Penybont yn cael eu dathlu.
Dywedodd Dr Barry Walters, Pennaeth Coleg Sir Benfro, sy'n cadeirio Grŵp Strategol WBL ColegauCymru,
“Mae Gwobrau Prentisiaethau Llywodraeth Cymru yn gydnabyddiaeth i’w chroesawu o werth rhaglenni prentisiaeth yma yng Nghymru. Wrth i ni ddod allan o gyfnod arbennig o heriol, rydyn ni wrth ein bodd bod gwaith caled dysgwyr, ymarferwyr a busnesau yn cael y gydnabyddiaeth maen nhw mor haeddiannol ohoni."
Bydd y digwyddiad rhithiol hwn yn cael ei gynnal ddydd Iau 17 Mehefin a bydd yn arddangos cyflawniadau rhagorol dysgwyr ysbrydoledig Cymru, cyflogwyr llwyddiannus ac ymarferwyr dysgu ymroddedig sydd wedi mynd yr ail filltir yn ystod y cyfnod digynsail hwn. Bydd y gwobrau’n cydnabod talent ac ymrwymiad parhaus y rhai sy’n cyfrannu at lwyddiant rhaglenni Cyflogadwyedd a Phrentisiaethau Llywodraeth Cymru.
Ychwanegodd Prif Weithredwr ColegauCymru Iestyn Davies,
“Mae prentisiaethau yn ac yn parhau i fod yn offeryn gwerthfawr, nid yn unig i ddysgwyr ond i adferiad economaidd a ffyniant Cymru mewn byd ôl-Covid. Mae'n galonogol gweld rhaglenni dysgu seiliedig ar waith yn cael eu dathlu fel hyn.”
