Mae'r diweddariad heddiw ar gymwysterau 2021 gan y Gweinidog Addysg a'r Gymraeg yn cydnabod yr heriau sylweddol sy'n wynebu dysgwyr sy'n derbyn eu canlyniadau cymwysterau yn haf 2021.
Rydym yn croesawu cydnabyddiaeth y Gweinidog o waith darlithwyr, tiwtoriaid ac athrawon fel ei gilydd gan fod y sector addysg wedi ceisio dysgu o'r sefyllfa anodd a wynebir yn gyffredinol yn ystod haf 2020. Mae colegau wedi gweithio'n galed i gyrraedd graddau sy'n seiliedig ar dystiolaeth ac yn deg i ddysgwyr.
Mae cynrychiolaeth colegau addysg bellach ar y Grŵp Cynghori Dylunio a Chyflawni wedi galluogi'r sector i wneud mewnbwn ystyrlon a sicrhau bod y trefniadau amgen i arholiadau yn gweithio i golegau yn ogystal ag ysgolion. Rydym yn ddiolchgar i Lywodraeth Cymru am y cyfle i wneud y cyfraniad hwn.
Dywedodd Prif Weithredwr ColegauCymru, Iestyn Davies,
“Mae datganiad heddiw yn gydnabyddiaeth gadarnhaol o waith caled ar draws y sector wrth inni ddechrau ail flwyddyn o ganlyniadau heb arholiadau yn y mwyafrif helaeth o achosion.”
Ychwanegodd Mr Davies,
“Yn hanfodol, rhaid i ddysgwyr galwedigaethol beidio â phrofi’r un driniaeth wael â’r llynedd gyda chanlyniadau wedi’u gohirio ar y funud olaf. Mae angen i ddysgwyr galwedigaethol weld y gallant ddisgwyl cael eu trin â'r un parch â'u cymheiriaid academaidd.”
Mae ColegauCymru hefyd yn croesawu’r gefnogaeth ariannol werthfawr a ddarperir i’r sector addysg bellach i sicrhau parhad dysgu ac yn ystod Pandemig Covid19, gan gynnwys yr £1.6m y mae Llywodraeth Cymru yn ei roi i CBAC i sicrhau y bydd ffioedd CBAC i golegau ac ysgolion yn cael eu gostwng 50%.
Gwybodaeth Bellach
Datganiad y Cabinet
Datganiad Llafar: Cymwysterau yn 2021
22 Mehefin 2021
