Rydym wrth ein bodd yn cadarnhau bod ein cais consortiwm ar gyfer Cynllun Turing 2025/26 wedi bod yn llwyddiannus. Diolch i'r cyllid hwn, bydd 118 o ddysgwyr - Lefel A a galwedigaethol - ochr yn ochr â 19 o staff sy'n dod gyda nhw, yn cymryd rhan mewn lleoliadau symudedd dramor a fydd yn para rhwng 14 a 17 diwrnod. Dyfarnwyd cyfanswm o £258,234 o grant i ariannu rhaglen eang o brofiadau dysgu rhyngwladol i ddysgwyr addysg bellach yng Nghymru.
Mae'r prosiect, sy'n rhedeg o 1 Medi 2025 i 31 Awst 2026, yn dwyn ynghyd bartneriaeth gref o dri choleg: Coleg Caerdydd a'r Fro, Y Coleg Merthyr Tudful, a Choleg Catholig Dewi Sant.
Mae'r cyrchfannau'n cynnwys: 
- UDAGwyddoniaeth a Mathemateg
- Yr AlmaenPeirianneg
- Japan Awyrofod
- Tanzania Gofal Iechyd
- Yr Ariannin Y Gymraeg
- India Economeg/Mathemateg a Saesneg/Creadigol
Bydd y lleoliadau rhyngwladol hyn yn cynnig cyfleoedd gwerthfawr i ddysgwyr adeiladu gwybodaeth dechnegol ac academaidd tra hefyd yn datblygu sgiliau meddal hanfodol fel addasrwydd, ymwybyddiaeth ddiwylliannol, cyfathrebu a gwydnwch. Mae'r rhain yn briodoleddau hanfodol a fydd nid yn unig yn cefnogi astudiaethau presennol dysgwyr ond hefyd yn ehangu eu gorwelion addysg a gyrfa yn y dyfodol.
Ffocws allweddol y prosiect yw ehangu cyfranogiad. Rydym yn falch o nodi bod 53% o'r dysgwyr y disgwylir iddynt gymryd rhan yn dod o gefndiroedd difreintiedig, tra bod 13% yn ddysgwyr ag anghenion dysgu ychwanegol.
Dywedodd Rheolwr Prosiect Rhyngwladol ColegauCymru, Siân Holleran,
“Rydym wrth ein bodd ein bod wedi sicrhau'r cyllid hwn am y drydedd flwyddyn. Mae Cynllun Turing yn parhau i agor drysau i ddysgwyr Cymru, gan ddarparu profiadau sy'n newid bywydau a safbwyntiau byd-eang. Mae'r rhaglen hon yn adlewyrchu ein hymrwymiad i gynhwysiant a rhagoriaeth, gan sicrhau y gall pob dysgwr elwa o symudedd rhyngwladol, waeth beth fo'u cefndir.”
Ychwanegodd Prif Weithredwr ColegauCymru, David Hagendyk,
“Mae’r llwyddiant hwn yn dangos cryfder ein gwaith rhyngwladol a phŵer cydweithio ar draws y sector addysg bellach yng Nghymru. Drwy’r Cynllun Turing, rydym yn helpu i greu cenhedlaeth o ddysgwyr â meddylfryd byd-eang sydd â’r sgiliau, yr hyder a’r uchelgais i ffynnu mewn byd sy’n gynyddol gydgysylltiedig. Mae’n gyfle gwych i ddysgwyr o bob cefndir brofi rhywbeth gwirioneddol drawsnewidiol.”
Gwybodaeth Bellach
Am ragor o wybodaeth am Gynllun Turing 2025/26, ewch i drosolwg swyddogol Llywodraeth y DU:
Trosolwg o Gynllun Turing 2025/26
Siân Holleran, Rheolwr Prosiect Rhyngwladol ColegauCymru
Sian.Holleran@ColegauCymru.ac.uk
