Heddiw, penodwyd Cefin Campbell AS yn Ddirprwy Weinidog dros Sgiliau ac Addysg Drydyddol Llywodraeth Cymru. Mae gan ColegauCymru hanes cryf o weithio mewn partneriaeth â Llywodraeth Cymru, a byddwn yn parhau i chwarae rhan gadarnhaol a rhagweithiol wrth sicrhau bod gennym sector addysg bellach cryf a gwydn.
Dywedodd Prif Weithredwr ColegauCymru, David Hagendyk,
“Heddiw, rydym yn llongyfarch Cefin Campbell AS yn gynnes iawn ar ei benodiad yn Ddirprwy Weinidog dros Sgiliau ac addysg drydyddol. Bydd tymor y Senedd hwn yn un diffiniol ar gyfer dyfodol Cymru. Bydd heriau sero net, cyflawni twf economaidd cynaliadwy, newid technolegol cyflym, a gofynion newydd ar wasanaethau cyhoeddus yn llunio dyfodol Cymru am genhedlaeth. Mae ColegauCymru a’n haelodau yn barod i weithio gyda thîm newydd Llywodraeth Cymru, ac mae’n hanfodol bod y cabinet yn deall y pwysau sydd o’n blaenau o’r diwrnod cyntaf. Mae niferoedd dysgwyr llawn amser yn ein colegau yn codi eto ond nid yw’r cyllid yn cadw i fyny, mae penderfyniadau i’w gwneud ynghylch dyfodol cymwysterau galwedigaethol, mae penderfyniad hollbwysig i’w wneud ynghylch cefnogaeth yn y dyfodol ar gyfer darpariaeth rhan-amser i oedolion.
Mae'n hanfodol bod y gyllideb prentisiaethau a neilltuwyd yn cael ei diogelu yn y portffolio trydyddol ehangach. Mae absenoldeb targed prentisiaethau yn golygu ansicrwydd gwirioneddol ynghylch polisi sgiliau yn y dyfodol.
Gyda thîm cabinet newydd yn ei le, mae hwn yn gyfle i ni ddyblu ein hymdrechion i sicrhau pecyn ariannu cynaliadwy ar gyfer colegau – i’n galluogi i gyflawni’r cwricwlwm craidd yn ogystal â’r holl gefnogaeth bwysig i ddysgwyr. Ni ddylem byth golli ffocws ar godi ansawdd, ac rydym yn edrych ymlaen at gydweithio â’r Ddirpwy Gweinidog i ddatblygu strategaeth addysg a hyfforddiant galwedigaethol, sy'n cyd-fynd yn agos â blaenoriaethau economaidd a diwydiannol Cymru. Mae colegau'n barod i chwarae eu rhan yn yr oes newydd hon i Gymru, gan helpu i sicrhau twf a chyfleoedd newydd i'n cymunedau, a mynd i'r afael â lefelau tlodi cronig.
Mae addysg bellach yn stori lwyddiant datganoli. Dros y pum mlynedd ar hugain diwethaf mae'r sector wedi'i drawsnewid yn union oherwydd bod arweinwyr yn barod i wneud y penderfyniadau anodd sydd eu hangen i fod yn gynaliadwy yn ariannol ac i ddarparu addysg a hyfforddiant o ansawdd uchel. Mae colegau wedi ennill yr hawl i gael ymddiriedaeth y llywodraeth ac mae ein sector unwaith eto'n barod i chwarae ei ran wrth wynebu heriau'r dyfodol”.
Gwybodaeth Bellach
Maniffesto ColegauCymru ar gyfer etholiad Senedd 2026
Twf, Cyfle a Thegwch
Amy Williams, Swyddog Polisi
Amy.Williams@ColegauCymru.ac.uk
