Cymru 0 - Lloegr 4
Yng ngêm olaf y tymor, heriodd tîm Merched Colegau Cymru dîm cryf o'r ECFA ym Mharc Chwaraeon Prifysgol De Cymru gyda thîm Cymru yn gobeithio adeiladu ar y profiadau o chwarae yn erbyn ysgolion Awstralia yn gynharach yn y flwyddyn.
Dechreuodd tîm Cymru’r gêm yn gryf gydag amddiffyn gwych a chwarae adeiladu da, dangosodd tîm Lloegr eu safon yn ddiweddarach yn yr hanner gan fanteisio ar rai camgymeriadau amddiffynnol i arwain 2-0 ar yr hanner. Dilynodd yr ail hanner thema debyg gyda Cholegau Cymru yn creu rhai cyfleoedd da ond yn methu â throsi eu cyfleoedd, unwaith eto profodd Lloegr mai nhw oedd yr ochr gryfach gan sgorio ddwywaith eto i orffen yn fuddugol 4-0.
Er gwaethaf canlyniad siomedig i’r tîm, cynigiodd y gêm brofiad dysgu gwerthfawr yn erbyn gwrthwynebiad o safon uchel ac amlygodd benderfyniad a photensial y garfan. Mae’r gêm yn adlewyrchu’r cydweithio cynyddol a’r cyfleoedd cystadleuol rhwng Cymru a Lloegr trwy waith ColegauCymru ac Association of Colleges (AoC).
Hoffai ColegauCymru ddiolch yn ddiffuant i Chwaraeon Prifysgol De Cymru am eu nawdd a'u cefnogaeth barhaus wrth gynnal y gêm, gan helpu i greu amgylchedd proffesiynol ac ysbrydoledig i'r chwaraewyr.
Tynnodd y gêm sylw hefyd at bwysigrwydd cystadleuaeth ar lefel ryngwladol wrth gefnogi datblygiad dysgwyr, gan gynnig y cyfle iddynt gynrychioli eu colegau ar lwyfan ehangach a meithrin hyder ar y cae ac oddi arno.
Dywedodd Prif Weithredwr ColegauCymru, David Hagendyk,
“Mae gemau fel hyn yn hanfodol wrth roi profiadau cystadleuol o ansawdd uchel i’n dysgwyr sy’n cefnogi eu datblygiad chwaraeon a phersonol. Rydym yn hynod ddiolchgar i Chwaraeon Prifysgol De Cymru am eu cefnogaeth barhaus, sy’n helpu i wneud y cyfleoedd hyn yn bosibl. Mae gweithio mewn partneriaeth â Chymdeithas y Colegau i ddarparu’r cyfleoedd trawsffiniol hyn yn hynod werthfawr, ac mae’n wych gweld twf parhaus pêl-droed menywod ar draws ein colegau yng Nghymru.”
Ychwanegodd Rheolwr Tîm Colegau Cymru, Sean Regan (Coleg Cambria),
“Roedd hon yn gêm anodd yn erbyn tîm cryf o Loegr, ond yn union y math o brofiad sydd ei angen ar y chwaraewyr hyn. Mae cystadlu ar y lefel hon yn eu helpu i ddatblygu gwydnwch, gwaith tîm a dealltwriaeth o’r gêm. Mae’r cynnydd mewn pêl-droed menywod ar draws colegau yn amlwg i’w weld, ac mae’n gyffrous bod yn rhan o’r daith honno.”
Mae Chwaraeon Colegau Cymru yn parhau i chwarae rhan allweddol wrth ehangu cyfleoedd i ddysgwyr benywaidd, cefnogi twf y gêm a gweithio ochr yn ochr â phartneriaid fel Cymdeithas y Colegau i gryfhau llwybrau a chyfranogiad ar draws y sector addysg bellach.
Carfan Pêl-droed Merched Colegau Cymru 2025/26
Coleg y Cymoedd
- Chloe Simmonds
- Amiee Deacon
- Casi Gregson
- Evie Brown
- Robyn Lloyd
- Aliya Hull
- Torri Grenfell
Coleg Menai
- Catrin Roberts
- Amber Roberts
- Angharad Jones
- Erin Basinger
Coleg Gwent
- Ffion Evans
- Meg Gladwin
Coleg Cambria
- Lucy McCarten
- Scarlett Foster-Noble
Coleg Gŵyr Abertawe
- Georgia Cable
- Charlotte Merry
Coleg Llandrillo
- Sienna Perry
- Lexi Walsh
Grŵp Colegau NPTC
- Grace John
- Ellie Gibbins
Coleg Sir Gâr / Coleg Ceredigion
- Lily Moralee-Hughes
Gwybodaeth Bellach
Rob Baynham, Rheolwr Prosiect Lles Actif a Chwaraeon ColegauCymru
Robert.Baynham@ColegauCymru.ac.uk
